Мавзунинг долзарблиги. Мамлакатда иқтисодий ўсишга, аҳоли турмуш даражасини яхшилашга ҳамда иқтисодиѐтнинг барча тармоқларида рақобатдошлик кўрсаткичини оширишга эришиш, биринчи навбатда саноат тармоқларини юқори технологиялар асосида ривожлантиришга хорижий инвестицияларни жалб этиш, ишлаб чиқариш соҳасини модернизациялаш, техник ва технологик қайта жиҳозлашга боғлиқ. Ишлаб чиқаришни модернизация қилиш, техник ва технологик жиҳатдан қайта жиҳозлаш ўз-ўзидан мамлакатда товарлар ишлаб чиқариш жараѐнида фойдаланиладиган барча турдаги иқтисодий ресурсларни оқилона ишлатишда асос бўлади. Кенг маънода инвестиция (сармоя) – даромад ѐки фойда олиш мақсадида маблағни муайян муддатга тадбиркорлик ва бошқа фаолият турлари (объектлари)га йўналти-ришни англатади. Шуни айтиш лозимки, дунѐ ҳамжамиятининг ҳозирги тараққиѐт босқичида бирор мамлакат инвестицияларсиз ижтимоий-иқтисодий ривожланишга эриша олмайди.
